Еразмус+ KA210 – Да ги надминеме различностите преку театар (Мобилност Охрид)

За проектот

Мобилноста во Охрид претставуваше завршна и клучна фаза од проектот „Еразмус+ KA210 – Да ги надминеме различностите преку театар“. Македонскиот тим ги пречека партнерите од Италија и Грција со традиционален леб и слатки, симболизирајќи гостопримство и почит. По воведните активности и ice-breaking игри, учениците започнаа со интензивни танцово-театарски репетиции насочени кон проблематиката на злоставувањето.

Под менторство на кореографот Даниел Наумоски од Танцовото студио Соната, како и со поддршка од наставниците и менторите, учесниците преку движење и телесен израз ги прикажаа емоциите и перспективите и на жртвата и на насилникот. Работата беше интензивна и емотивна, а учениците покажаа високо ниво на посветеност и меѓусебна поддршка.

Програмата беше збогатена со културни активности, вклучувајќи бродска екскурзија по Охридското Езеро со посета на Заливот на Коските и манастирот Свети Наум, како и разгледување на стариот дел на градот Охрид, црквите Света Софија, Богородица Перивлепта и Свети Јован Канео. Посебен акцент имаше и работилницата за изработка на маски под менторство на професорката Катерина Слатинова, кои беа користени во финалната кореодрама.

Кулминацијата се случи на 22 март со јавната танцово-театарска претстава во ОСУ „Св. Климент Охридски“. Настапот успешно ја пренесе пораката за емпатија, разбирање и активна борба против злоставувањето. Организирани од НВО Xanadu Art, активностите во Охрид го означија официјалното завршување на проектот, оставајќи силен впечаток и трајна мотивација кај сите учесници.